Documents Plurals

MANIFEST - DOCUMENTS PLURAUS

Er article 3 dera Constitucion espanhòla dispause qu'eth castelhan ei era lengua espanhòla oficiau der Estat, establís qu'es autes lengües espanhòles seràn oficiaus enes respectives comunitats autonòmes cossent damb es sòns estatuts d'autonomia e anóncie qu'era diuersitat lingüistica d'Espanha serà objècte d'especiau respècte e proteccion.

Maugrat aguest mandat constitucionau de respècte e proteccion de caractèr plurilingüe der Estat es lengües espanhòles desparières deth castelhan, que se parlen en un territòri a on viu mès deth 40 per cent dera poblacion espanhòla, an estat absentes pendent mès de 20 ans d'un seguit d'ambits de grana importància simbolica e practica, entre es quaus i a era documentacion personau des ciutadans (eth document nacionau d'identitat, eth passapòrt e eth permís de condusir) e era documentacion des residents estrangèrs, qu'en ua epòca d'immigracion creishenta coma era actuau, a aquerit ua importància qu'enquia ara non auie auut.

Aguesta practica espanhòla contraste damb era de d'autes democràcies plurilingües d'Euròpa e deth mon, que trasladen as sòns documents era sua diuersitat lingüistica intèrna e d'aguesta manèra permeten, non sonque qu'es ciutadans de lengües diferentes se reconeishen enes sòns documents, senon tanben que toti es ciutadans, independentament dera sua lengua abituau, atau coma es residents estrangèrs, agen era oportunitat de veir reflectit ena sua documentacion eth pluralisme lingüistic dera societat e l'accèpten coma un hèt normau.

Atau, Belgica incorpòre en document nacionau d'identitat e en passapòrt eth francés e eth neerlandés, e tanben er aleman, eth quau sonque lo parle un 1 per cent dera poblacion; Finlàndia utilize eth finés e eth suèc en toti es documents; Canadà hè çò de madeish damb eth francés e er anglés; e es documents oficiaus en Soïssa contien es quate lengües oficiaus (francés, aleman, italian e romanche, eth quau, coma er aleman en Belgica, sonque parle un 1 per cent dera poblacion). Enes quate cassi, eth plurilingüisme ei present en toti es documents, includit eth passapòrt, sense besonh de demana prealabla der interessat e independentament deth lòc a on s'expedisquen.

Coma ciutadans espanhòus que parlam lengües diferentes deth castelhan mos volem reconéisher enes nòsti documents personaus, e tanben volem qu'eth conjunt dera societat espanhòla coneishe e hèsque sòn eth caractèr plurilingüe der Estat que toti compartim.

Pr'amor d'açò, en tot profitar era celebracion der An Europèu des Lengües, convocat pera Union Europèa e eth Conselh d'Euròpa entà promòir era consciéncia dera riquesa dera diuersitat lingüistica laguens dera Union Europèa e entà encoratjar eth multilingüisme, volem demanar as nòsti governants que prenguen totes es mesures de besonh tà qu'en tèrme mès breu possible es documents nacionaus espanhòus adòpten un regim lingüistic parion ath qu'apliquen en d'autes democràcies plurilingües deth mon, que permete ua plasmacion efectiua deth mandat constitucionau de respècte e proteccion dera diuersitat lingüistica espanhòla.