Estampetas plurals

L'1 de chinero de 1850 s'emitió a primer estampeta postal moderna española. Dende allora, España ha emitidas un total de 3.612 estampetas, d'as cualas 19 han lebau bel testo en catalán (un 0,52 por ziento), siete han lebau bel testo en galego (un 0,19 por ziento) y sólo que cuatro han lebau bel testo en basco (un 0,11 por ziento). En iste periodo, d'atra parti, España no ha emitiu ni una estampeta sisquiera en as atras luengas fabladas en o suyo territorio (aragonés, asturiano y oczitano d'a Bal d'Arán). En conchunto, as 30 estampetas emitidas en luengas diferens d'o castellano sólo ripresentan que o 0,83 por ziento de todas as estampetas emitidas en 149 añadas.

Ista trayeutoria española se concara con a d'un buen numero d'estaus plurilingües d'o mundo, que han reflexau en as suyas estampetas a suya dibersidá lingüistica interna y d'ista traza l'han acobaltau drento y difuera d'as suyas mugas con o deseyo de fer-la unibersal. En Europa, son bien conoxius os casos de Belchica (que emite por un regular as suyas estampetas en franzés, nederlandés y alemán), Finlandia (que las emite en finés y sueco), Irlanda (que las emite en gaelico y en anglés) y Suiza (que las emite en alemán, en franzés, en italiano y en romanche).

A Costituzión española de 1978 premitió a ofizialización d'o catalán, o galego y o basco en os suyos territorios istoricos, y imposó a l'Estau o mandau de rispetar y protexer a suya dibersidá lingüistica interna. Ye zierto que 17 d'as 19 estampetas con testos en catalán y todas as estampetas con testos en galego y basco son posteriors a l'aprobazión d'a Costituzión, pero creyemos que istas zifras no premiten fablar d'una promozión sinificatiba por parti de l'Estau d'as luengas dibersas d'os suyos zidadanos.

Como fablans de luengas diferens d'o castellano que mos queremos reconoxer en os siñals de l'Estau, queremos formular publicamén a demanda de que as nuestras luengas sigan incorporadas a las estampetas españolas de traza que faiga chustizia a o suyo peso demografico, istorico y cultural, y que de bez premita dar un cumplimiento que no siga meramén testimonial a o mandato costituzional de rispeto y proteuzión d'a dibersidá lingüistica española. En bispras d'o 150no cabodaño d'a primer estampeta moderna española, queremos istar a os nuestros gobernans a prener todas as midas nezesarias ta que l'1 de chinero de l'año 2000, o más tardi, se cumpla un birache enta la pluralidá en a dica agora uniforme istoria filatelica española.