Er 1 de gèr de 1850 s'emetec eth prumèr sagèth postau modèrn espanhòu. D'alavetz ençà, Espanha a emetut un totau de 3.612 sagèths, des quaus 19 an portat bèth tèxte en catalan (un 0,52 per cent), sèt an portat bèth tèxt en galhèc (un 0,19 per cent) e sonque quate an portat bèth tèxte en eusquèra (un 0,11 per cent).En aguest periòde, per contra, Espanha non a emetut cap de sagèth enes autes lengües parlades en sòn territòri (aragonés, asturian e occitan dera Val d'Aran). En conjunt, es 30 sagèths emetudi en lengües diferentes deth castelhan sonque representen eth 0,83% de toti es sagèths emetudi en 149 ans.

Aguesta trajectòria espanhòla contraste damb era d'un bon nombre d'estats plurilingües deth mon, qu'an reflectit enes sòns sagèths era sua diversitat lingüistica intèrna e atau l'an promoigut laguens e dehòra des sues frontères damb eth desir de hè-la universau. En Euròpa, son ben coneishudi es casi de Belgica (qu'emet regularment sagèths en neerlandés, francés e aleman), Finlàndia (que n'emet en finés e suec), Irlanda (que n'emet en gaelic e anglés) e Soïssa (que n'emet en aleman, francés, italian e romanche).

Era Constitucion espanhòla de 1978 permetec era oficialisacion deth catalan, eth galhèc e er eusquèra enes sòns territòris istorics, e imposèc ar Estat eth mandat de respectar e protegir era sua diversitat lingüistica intèrna. Ei cèrt que 17 des 19 sagèths tamb tèxtes en catalan e toti es sagèths damb tèxtes en galhèc e eusquèra son posteriors ara aprovacion dera Constitucion, mès entenem qu'aguestes chifres non permeten parlar d'ua promocion significatiua per part der Estat des lengües diuèrses des sòns ciutadans.

Com a parlants de lengües diferentes deth castelhan que mos volem reconéisher enes simbèus der Estat, volem formular publicament era demana qu'es nòstes lengües siguen incorporades enes sagèths espanhòus d'ua manèra que hèsque justícia ath sòn pes demografic, istoric e culturau, e qu'ara ora permete dar un compliment que non sigue sonque testimoniau ath mandat constitucionau de respècte e proteccion dera diversitat lingüistica espanhòla. En tot apropà-mos deth 150au. aniversari deth prumèr sagèth modèrn espanhòu, volem cridar as nòsti governants tà préner totes es mesures de besonh entà qu'er 1 de gèr der an 2000, coma mès tard, se complisque un viratge ena pluralitat ena enquiara uniforme istòria filatelica espanhòla.